والينا زينا وحالف مايدلينا / محمد عبد الماجد
For your copy-and-pasting pleasure.
السودان اليوم:
حكاية جمال الوالي مع المريخ وهو رئيس للجنة تسيير تتكون من (30) عضواً (30 راكب) سميّت مجازا بـ (بص الوالي) الذي يسوقه جمال الوالي ، زي حكاية سواق (بص السيرة) والذي كنا قد أشرنا له، والذي ما ان يصل (بيت العرس)، إلّا ويغنوا له الناس الفي (بص السيرة) …(سواقنا زينا حالف ما يدلينا).
والسواق يصدق.
يقوم السواق ينفعل ..ويقعد يلفلف بالبص في الحلة…والنسوان يزغردن.
والبنات يغنن (سواقنا زينا وحالف ما يدلينا).
والسواق ينطط براهو في مقعدو من الفرحة والطرب.
وكل مرة يأخد ليه (شوفه) في المرايا بتاعة البص.
يشوف ليك البنات آخر انبساطة.
وسواقنا زينا وحالف ما يدلينا.
والسواق كل ما يدور يقيف ويسمع المقطع ده..يقوم تاني يلف.
ويبص في المرايا.
والنسوان يزغردن.
و ينفعل.
والبنات يغنن (سواقنا زينا وحالف ما يدلينا).
والسواق من انفعالو يقوم يضرب البوري.
والبوري مرات يضرب براهو.
والشفع ينططوا في البص.
والنسوان يزغردن.
والحلة تتفرج.
والبنات يغنن (سواقنا زينا وحالف ما يدلينا).
والسواق يضحك لي هنا.
الحلة كلها تطلع تتفرج في بص السيرة.
الحاصل شنو الليلة؟.
والشفع يسكو (البص).
ويتشعبطوا فيه.
والسواق يفرمل …وخلاص يكون عاوز يقيف.
يقوم يسمع (سواقنا زينا وحالف ما يدلينا).
يشوف في المرايا.
يقوم تاني يلف.
بالطريقة دي لمن الواطة تقرب تصبح.
والسواق يعاين للانبير بتاع البنزين.. يلقى العداد صفّر.
ما يحدث في (بص السيرة) يحدث الآن في (بص الوالي).
اصلو ما في اختلاف.
ما تقعدوا تغالطوا فينا ساكت.
نفس الملامح والشبه.
والغنية ذاتها وعصام الحاج.
ومزمل ابوالقاسم الناطق الرسمي للبص.
جمال الوالي قدر ما يقول ليهم خلاص عاوز أمشي..ناس المريخ يقعدوا يتشبكوا فيه.
الشبكة دي شنو؟.
شبكة شديدة.
قدر ما يقول خلاص.
يقولوا ليه لا.
وجمال الوالي وقت يسمع (سواقنا زينا حالف ما يدلينا) برضو بقوم ينفعل ويلف بالبص.
ووالينا زينا وحالف ما يدلينا.
واعلام المريخ يغني.
وجمهور المريخ يغني.
وبابكر سلك بسخن الحفلة.
ومعاوية الجاك يقوم يبشر ويرجع يقعد تاني.
وهيثم كابو ..ماسك في مازال الليل طفلاً يحبو.
وسواقنا زينا وحالف وما يدلينا.
ووالينا زينا وحالف ما يدلينا.
دور بينا البلد دا.
نحرق البنزين والبابور جاز.
ووالينا زينا وحالف ما يدلينا.
الليلة زينا.
ويا عروسنا جينا.
انتخابات المريخ الآن ترشح فيها للرئاسة فقط آدم سوداكال.
ما في زول اتقدم عشان يرشح نفسه للرئاسة غير آدم سوداكال.
كلهم عملوا فيها ما عارفين.
وما فاضيين.
ونازلين قريب.
آدم سوداكال هناك اشكاليات قانونية تقف عائقا أمام رئاسته للمريخ.. هذا أمر معروف.
ولا عاوز ليه (طعون).
والدليل على ذلك انو في أول أيام الطعون قدمت (9) طعون في سوداكال.
الليلة الطعون يمكن ترتفع الى 21.
9 طعون في آدم سوداكال…وجمال الوالي قاعد كل هذه الفترة بالتعيين ما في زول قال ليه حاجة.
ولا شوكة.
15 سنة …جمال الوالي في المريخ ما في زول طعن فيه.
ووالينا زينا وحالف ما يدلينا.
جاء بالتعيين.
او جاء عبر الجمعية العمومية.
ما في زول بقول ليه حاجة.
بل ليس هناك مريخابي واحد يمكن ان يقدم نفسه منافساً لجمال الوالي في الرئاسة.
حتى لو جمال الوالي ما اترشح.
وقال ما عاوز.
قال فترت عديل.
برضو ما في زول بترشح ضد جمال الوالي.
لا ود الياس.
لا الزول الجاب الكأس.
ولمن يتقدم زول زي آدم سوداكال …بقوموا يقدموا فيه (9) طعون.
ليه؟.
في شنو؟.
9 طعون في آدم سوداكال.
كل دا ليه عشان جمال الوالي يرجع تاني بالتعيين.
جمال الوالي بالانتخابات ما بمسك المريخ.
4 سنوات في المريخ …جمال ما بقعدها.
جمال الوالي عاوز يقعد 6 شهور بالتعيين ولمن تنتهي مدته يجددوا ليه تاني.
ووالينا زينا وحالف ما يدلينا.
وكل مرة يجيب ليه وجوه جديدة معاه.
يتغيروا كل الناس وجمال الوالي لا.
ووالينا زينا وحالف ما يدلينا.
لكن الذين خططوا لهذا السيناريو ..وقدموا آدم سوداكال عشان ( ينفس) ليهم الجمعية العمومية للمريخ.. ويرجع جمال الوالي مرة ثانية او رابعة او خامسة ما عارف ..ما حسبوها صاح.
أبداً.
جمعية المريخ العمومية فيها ناس اترشحوا لمناصب مختلفة في المجلس .
بل فيها مناصب يمكن ان نقول الفوز حدث فيها بالتزكية.
مثل منصب أمين المال والذي فاز به الصادق مدير مكتب سوداكال والذي لم يتم الطعن فيه، كما انه لم يترشح معه احد.
وهناك مناصب أخرى تم الترشح لها بعد تسديد رسوم الترشح.
يعني حكاية الغاء الجمعية العمومية واعادة جمال الوالي مرة ثانية …أمر غير وارد.
حكاية والينا زينا وحالف ما يدلينا في الحتة دي ما بتنفع.
ولا بتخارج.
إلّا اذا كانت الحكاية ما فيها قانون.
وماشة ساكت.
الشيء الغريب في المريخ انهم مع كل تلك الشعبية التى يمتلكها النادي والتنظيمات إلّا انه لم يترشح أحد غير سوداكال والذي قدمت ضده 9 طعون.
حتى تحالف المريخ والذي كان يدعي معارضة جمال الوالي لم يقدم شخصية للرئاسة .
حتى اسامة ونسى.. لم يتقدم.
اما ناس الهادي بشرى وصلاح قوش …طلعوا بتاعين جرايد ساكت.
ما في أي واحد في المريخ دق صدره وقدم نفسه غير آدم سوداكال.
لذلك فان التحية هنا جدير بها آدم سوداكال.
اعتقد ان موقفه هذا كان يفرض على الذين تقدموا بطعون ضده ان لا يقدموها.
على الأقل هو الوحيد الذي دق صدره.
وهو الوحيد القادر على تسيير نشاط المريخ (مالياً).
مع ذلك قدموا طعوناً فيه.
كيف يفوز آدم سوداكال بالتزكية.
في الوقت الذي تقدم فيه 9 طعون.
لو كان هناك مرشح آخر مع سوداكال لقبلنا تلك الطعون.
لكن ان تقدم (الطعون) فقط من أجل جمال الوالي لكي يعود بالتعيين بتبقى ما حلوة في حقكم يا ناس المريخ.
جمال الوالي لو كان عنده رغبة في المريخ كان يرشح نفسو.
كان يجي بالباب عديل.
ما كان في داعي لي (والينا زينا وحالف ما يدلينا).
على العموم المريخ سوف يدفع ثمن هذه (الجهجهة).
والخاسر الوحيد من ذلك هو المريخ.
ما تقعدوا تشبكونا ليك (والينا زينا وحالف ما يدلينا).
………..
ملحوظة : قوموا شوفوا ليكم (بص) تاني …البص دا ما قايم فيه عطل.
هوامش
أمس رحل عن دنيانا الصحفي النحلة عبدالله قانون.
الصحفي الذي كان يلتقط الخبر على بعد 900 ميل.
وكان يتواجد في كل الأنشطة.
كان بيكتب من منطقة الحدث.
نسأل الله له الرحمة ..وان يعوضه شبابه بالجنة.
عبدالله قانون كان صحفي (اخباري).
لو اتخذ طريقا آخر غير الطريق الشاق الذي انتهجه لحقق أضعاف ما حققه الآن.
المريخ يلعب غداً في الفاشر.
من يشرف على المريخ في هذه الفترة.
جمال الوالي ام آدم سوداكال.
الراجح ان يتم فتح باب الترشح مرة أخرى لرئاسة نادي المريخ.
واحتمال يظهر أسامة ونسى تاني.
او الهادي بشرى.
جمال الوالي هل يصر على موقفه.
مباراة الهلال القادمة هل سوف يلعبها الهلال امام تريعة البجا ام أمام هلال الابيض..؟
دوري ممتاز ما مفهوم.
وما معروف برمجتو ذاتها ماشة كيف؟.
الكورة السودانية اذا أرادت ان تعود الى رشدها ..عليها بالدكتور كمال شداد.
الجمعية العمومية للاتحاد يوم 29 اكتوبر.
تاني ح تتنظر كل هذه المدة مع هذا الاتحاد.
تاني ح نصبر أكتر من شهر مع اتحاد معتصم.
اتحاد معتصم بمجدي واسامة والطريفي ظلم الهلال وضبحه ضبيحة.
اتحاد مع معتصم واسامة ومجدي وعصام الحاج ح يعمل شنو في الهلال.
مجموعة معتصم جعفر خطر حقيقي على الهلال وعلى الكورة السودانية.
عشان كدا اوقفوا عبث هذه المجموعة من الآن.
حاصروها.
وأكشفوها للناس.
الناس ديل جمدوا الكورة السودانية.
اذا عادوا مرة ثانية ح يعملوا شنو أكتر من (التجميد).
محمد جعفر قريش مرشح نائب رئيس في الاتحاد.
ومرشح نائب رئيس في المريخ.
نفهم شنو يعني.
اتحاد – مريخ واحد يعني.
معتصم جعفر الذي أعلن اعتزاله أكثر من مرة ..رشح نفسه لرئاسة الاتحاد.
المرشح المعتزل.
اذا كان أندية الممتاز غير قادرة على تحديد مرشحها في الاتحاد والاتفاق عليه كيف سوف تتوحد في (الأصوات)؟.
الحذر واجب.
حتى لا يعود لنا معتصم جعفر ومجموعته مرة ثانية.
بقاء مكسيم كل هذه الفترة خارج البلاد أمر يسأل منه المجلس.
لماذا سافر مكسيم في الاصل والمنافسات مستمرة.
حكاية لم يجد حجز أمر مضحك.
حجز شنو؟.
هو ح يرجع يعني بي (مركب).
…………….
عاجل : اللهم أرحم عبدالله قانون وتقبله قبولاً حسن وأسكنه فسيح جناتك يا رب يا كريم
ليست هناك تعليقات